майдандағы армия және флот

(Действующая армия и флот)

қарулы күштердің тылдағы басқа да бөлімдерінен айырмашылығы соғыс уақытында ұрыс қимылдарын жүргізуге тікелей қатысады. Майдандағы армия және флот қатарында деп тану және осыған орай жеке құрамға берілетін жеңілдіктер әр мемлекеттің арнайы үкімет жарлықтары арқылы белгіленеді және өзіндік ерекшеліктері бар. Бұрынғы КСРО-да М.а.ф. құрамына майданның далалық басқармасы, операцияларды дайындауды және жүргізуді басқаратын, флоттардың басқарма органдары, әрекеттегі майдан мен флоттың операциялық аумағының тылдық шекараларында, сонымен қатар су жиегінен 100 км қашықтықтағы жағалауда тапсырмаларды орындау кезінде флоттар мен майдандар құрамына енетін құрамалар, бірлестіктер, бөлімдер, тылдық және т.б. бөлімдер жатқызылды. Әуе шабуылына қарсы қорғаныс әскерлерін, алыс авиация құрамалары мен бөлімдерін және майдандағы армия құрамына енбейтін басқа да әскерлерді майданның тыл шекаралары аумағында ұрыстық қамтамасыз ету тапсырмаларын орындауға және ұрыстық қимылдарға тікелей қатыстылығы болған жағдайда ғана майдандағы армия мен флот қатарына жатқызу қалыптасқан.